اتحاد کے صدر کی امیرِ جماعتِ اسلامی سے
ملاقات - تعاون کے فروغ اور اُمت کے مسائل پر تبادلۂ خیال
عالمی اتحاد برائے مسلم اسکالرز کے صدر، محترم ڈاکٹر علی
محیی الدین قرہ داغی نے جمعرات، 20 نومبر کی شام، جماعتِ اسلامی کے امیر انجینئر
حافظ نعیم الرحمن سے جماعت کے مرکز لاہور (صوبہ پنجاب کے دارالحکومت) میں ملاقات کی۔
یہ ملاقات اُن کی جماعت کے عمومی اجلاس میں شرکت کے سلسلے میں پاکستان آمد کے
دوران ہوئی۔
امیرِ جماعتِ اسلامی نے محترم صدرِ اتحاد کا پُرخلوص
استقبال کیا، دعوت قبول کرنے اور کانفرنس میں شرکت پر قدردانی کا اظہار کیا، اور
کہا کہ موجودہ حالات میں امتِ مسلمہ کو دینی خطاب کی تجدید، علومِ شرعیہ کی طرف
بڑھتی ہوئی توجہ، معاصر فقہی مسائل، فتاویٰ اور اصول و مقاصد کے میدان میں سنجیدہ
کاوشوں کی پہلے سے کہیں زیادہ ضرورت ہے۔
انہوں نے اس بات پر بھی زور دیا کہ علما کے خطابات کو ایک
ایسے بیانیے پر متحد ہونا چاہیے جو تشدد، انتہاپسندی، نفرت اور نسلی تعصب کی نفی
کرتا ہو، اور اعتدال و وسطیت کے فروغ پر مبنی ہو۔
ملاقات میں اتحاد اور جماعتِ اسلامی کے درمیان تعاون کے
فروغ، امت کے مسائل کے حل کے لیے مشترکہ کوششوں، اور علمی و دعوتی میدان میں مربوط
اقدامات کے امکانات پر تفصیلی گفتگو ہوئی، تاکہ مسلمانوں کے مفادات کا تحفظ ہو اور
صفوں میں وحدت پیدا ہو۔
اپنی جانب سے، ڈاکٹر قرہ داغی نے پرجوش استقبال اور
مہمان نوازی پر تشکر کا اظہار کیا اور کہا کہ یہ علمی کانفرنس ایسے وقت میں منعقد
ہو رہی ہے جب امتِ مسلمہ کو درپیش چیلنجز تیزی سے بڑھ رہے ہیں۔
انہوں نے کہا کہ عالمِ اسلام نہایت نازک اور پیچیدہ
حالات سے گزر رہا ہے، جس کے باعث علما پر لازم ہے کہ وہ مشاورت اور باہمی رابطے میں
اضافہ کریں، اور شرعی و اصلاحی خطاب کو ایسے انداز میں پیش فرمائیں جو اُمت کی
وحدت اور استحکام کا ذریعہ بنے۔
انہوں نے اس بات کی بھی نشاندہی کی کہ اس دور میں اُمت
کو ایک جامع اور متحد ہ بیانیے کی ضرورت ہے، جو اس کی تاریخی ذمہ داریوں کا احساس
دلائے، اس کے شعور اور بصیرت کو بڑھائے، اور اس کے فکری و سماجی ڈھانچے کے تحفظ میں
کردار ادا کرے۔ علما کی ذمہ داری ہے کہ وہ اقدار کے استحکام، شعور کی بلندی اور
اُمت کی یکجہتی و مضبوطی کے لیے ہر ممکن جدوجہد کریں۔
عالمی اتحاد برائے مسلم اسکالرز کے صدر کی یہ پاکستان
آمد جماعتِ اسلامی کی طرف سے جنرل کنونشن میں شرکت کی دعوت پر ہوا ہے۔ کانفرنس کے
پروگرام کا آغاز آج جمعہ سے ہو رہا ہے اور یہ اتوار، 21 تا 23 نومبر 2025ء تک منارۂ
پاکستان، لاہور کے تاریخی مقام پر جاری رہے گا۔
(ماخذ: الاتحاد)
ـــــــــــــــــــــــــــــــــــــــــــــــــــــــــــــ
* للاطلاع على الترجمة الكاملة للخبر باللغة العربية،
اضغط (هنا).